Sir Gawain and the Green Knight V in Middle English

Nay frayst I no fy3t in fayth I þe telle
hit arn aboute on þis bench bot berdle3 chylder
if I were hasped in armes on a he3e stede
here is no mon me to mach for my3te3 fo wayke
forþy I craue in þis court a crystemas gomen
for hit is 3ol and nwe 3er and here ar 3ep mony
if any so hardy in þis hous holdez hymseluen
be so bolde in his blod brayn in hys hede
þat dar stifly strike a strok for an oþer
I schal gif hym of my gyft þys giserne ryche
þis ax þat is heue innogh to hondele as hym lykes
and I schal bide þe fyrst bur as bare as I sitte
if any freke be so felle to fonde þat I telle
lepe ly3tly me to and lach þis weppen
I quit clayme hit for euer kepe hit as his auen
and I schal stonde hym a strok stif on þis flet
elle3 þou wyl di3t me þe dom to dele hym an oþer


    and 3et gif hym respite
    a twelmonyth and a day
    now hy3e and let se tite
    dar any herinne o3t say

If he hem stowned vpon fyrst stiller were þanne
alle þe heredmen in halle þe hy3 and þe lo3e
þe renk on his rounce hym ruched in his sadel
and runischly his rede y3en he reled aboute
bende his bresed bro3ez blycande grene
wayued his berde for to wayte quo so wolde ryse
when non wolde kepe hym with carp he co3ed ful hy3e
ande rimed hym ful richly and ry3t hym to speke
what is þis arthures hous quoþ þe haþel þenne
þat al þe rous rennes of þur3 ryalmes so mony
where is now your sourquydrye and your conquestes
your gry dellayk and your greme and your grete wordes
now is þe reuel and þe renoun of þe rounde table
ouerwalt wyth a worde of on wy3es speche
for al dares for drede withoute dynt schewed
wyth þis he la3es so loude þat þe lorde greued
þe blod schot for scham into his schyre face

    and lere

    he wex as wroth as wynde
    so did alle þat þer were
    þe kyng as kene bi kynde
    þen stod þat stif mon nere

Ande sayde haþel by heuen þyn askyng is nys
and as þou foly hatz frayst fynde þe behoues
I know no gome þat is gast of þy grete wordes
gif me now þy geserne vpon godez halue
and I schal bayþen þy bone þat þou boden habbes
ly3tly lepez he hym to and la3t at his honde
þen feersly þat oþer freke vpon fote ly3tis
now hatz arthure his axe and þe halme grypez
and sturnely sturez hit aboute þat stryke wyth hit þo3t
þe stif mon hym bifore stod vpon hy3t
herre þen ani in þe hous by þe hede and more
wyth sturne schere þer he stod he stroked his berde
and wyth a countenaunce dry3e he dro3 doun his cote
no more mate ne dismayd for hyns mayn dintez
þen any burne vpon bench hade bro3t hym to drynk

    of wyne

    Gawan þat sate bi þe quene
    to þe kyng he can enclyne
    I beseche now with sa3ez sene
    þis melly mot be myne

Back to Sir Gawain and the Green Knight IV On to Sir Gawain and the Green Knight VI